股神畢菲特精明一世，竟然會犯低級錯誤？佢旗下嘅巴郡半年內第二次漏報買股，最近俾美國司法部罰款89.6萬美元（約700萬港元）。
事緣巴郡喺2009年買入建材供應商USG嘅可換股債券，舊年12月行使部份債券，認購USG普通股，令巴郡喺USG嘅持股達28%，當時市值約9.5億美元，超過反壟斷法規定需申報嘅2.8億美元門檻，但巴郡一直冇向相關機構申報，近日終被罰款。
原來巴郡早有漏報前科，舊年6月巴郡行使Symetra Financial認購證，持股增至3.1億美元，又係漏報，巴郡耍晒冧話係唔小心，嗰次就只係被警告。
不過，區區幾十萬對於股神嚟講又何足掛齒？巴郡持有嘅USG股份，𠵱家市值已升至11.3億美元，較舊年年底多1.8億美元，賺幅已夠交200次罰款。