環境局局長黃錦星噚日接受會計界議員梁繼昌挑戰，拉埋政治助理區詠芷一齊，喺政總旁嘅餐廳空地參與冰桶挑戰。帶帽上陣嘅黃錦星，同區詠芷一樣表現錫身，區詠芷淋水時，先淋近半桶水喺身後，先至淋面濕身，兩人淋完後更即時抹身快閃。
統領環境局，連淋冰都要環保啲，黃錦星嗰桶水係雨水，區詠芷嗰桶係餐廳洗米水，以可循環再用嘅冷凍劑做冰，以免被人話浪費食水。黃錦星亦會捐錢畀美國ALSA及香港肌腱協會。被前下屬譚志源挑機嘅前財爺梁錦松，身在安徽都即時「找數」，仲捐錢畀美國ALSA同香港肌腱協會，並向同佢一樣係特首黑馬嘅前律政司司長黃仁龍下戰書。