坐擁美斯嘅阿根廷，今年10月14號歷史性訪港友賽港足，門票噚日正式開售，可惜偏偏撞正歌星鄭秀文（Sammi）年底喺紅館嘅演唱會同日開售，連同內部認購僅賣咗10,000張，Sammi則開賣個幾鐘即售罄，K.O.美斯幾條街！
貝鈞奇過百萬掃飛
阿根廷難得首次訪港，但友賽港足嘅門票，噚日一早10點開始喺網上同通利琴行開售，卻反應慘淡。雖然尖沙嘴、銅鑼灣等鬧市嘅通利，一早已有唔少南亞裔人士喺度排長龍（圖），但一問之下，原來10個有9個半都係買Sammi；而開賣咗個幾鐘，尖嘴職員宣佈演唱會飛賣晒後，人流突然走晒，只剩番4個人喺度買波飛。
不過，銅鑼灣都有唔少有心人買阿、港戰波飛，就連足總副主席貝鈞奇都係其中之一。貝生話︰「之前已用咗20萬買咗兩個包廂，再內部認購咗200幾張唔同價格嘅飛都唔夠『應酬』，目標係買500張招呼一班老友，預計花費都要成過百萬。」貝生亦承認，阿根廷訪港門票開售嘅宣傳不足，但佢認為距離開賽仲有兩個月時間，有信心到時可以逼爆香港大球場。
識睇，一定係睇足英台【英波Live】：
http://soccer.appledaily.com
http://bit.ly/engballlive