港超聯噚日舉行記者會（圖），公佈來季聯賽獲得中銀集團人壽嘅7位數字冠名贊助，當中「人人有份」嘅聯賽獎金更高達120萬港元。
首屆港超聯下月正式開鑼，足總噚日召開記招，除咗公佈聯賽有新嘅龍型標誌、比賽專用波同球證服裝外，重點係搵嚟中銀集團人壽做冠名贊助；冠軍獎金48萬，比上季多18萬之餘，其餘排名都有獎金，包尾嘅都有24,000蚊。至於電視直播方面，足總行政總裁薛基輔透露，目前正同兩間免費電視台傾緊，希望開季前成事，而新球季亦會聘請公司監察球賽，以確保聯賽喺公平公正嘅情況下進行。
大埔喜解財困即簽韋爾
此外，今季重返頂級聯賽嘅「升班馬」大埔，噚晚舉行周年大會，除咗公佈來季新波衫外，秘書長陳平亦公佈喜訊，搵到金利來集團6位數字贊助，班費已有近600萬港元，一紓財困。席上陳平仲公佈前南華荷蘭小國腳韋爾加盟，並唔排除羅致多兩個歐洲外援，包括一名中鋒同一名中堅。
識睇，一定係睇足英台【英波Live】：
http://soccer.appledaily.com
http://bit.ly/engballlive