憑短片《三輪車伕》衝出香港嘅綠葉王梁健平，演出過無數劇集，留下嘅「戰績」亦都唔少，但佢仍然堅持足28年：「受傷一定有，辛苦一定有，我哋成行咁多演員，人人都會經歷受傷同辛苦。真係冇沒辦法，當一個人好鍾意做戲嘅時候，咁我哋就會做呢啲事。」
懷住一夥敬業樂業嘅心，健平亦懂得苦中作樂：「有啲好笑嘢嘅，我記得好耐之前喺馬鞍山拍過一場戲，講我哋一班人混戰，有個演員拎個流星鎚打打吓斷咗，個保齡球咁大嘅流星鎚就砰一聲打中我個頭，打到我成個人跌咗落地！」健平受傷後更負傷返到電視城拍埋另一場戲，連自己眉心腫起咗都唔知，佢笑住咁回憶：「返到公司仲好笑，化妝師經驗豐富，幫我將個頭套個美人尖遮咗個傷口，我覺得又幾好喎！哪怕當日個樣好似壓住條眉咁，唔好睇都好，都拍咗嗰場戲先吖！我哋好多行家都係咁，受咗傷，全世界都會話冇事，哪怕真係好痛。」演員之路，或者從來都係有苦自己知，究竟有幾多綠葉又可以好似健平咁，等到有出頭嘅一日？！