全國港澳研究會副會長齊鵬飛噚日出席有關鄧小平同香港一國兩制政治建設嘅座談會，話香港部份人士對一國兩制方針政策同《基本法》理解片面、甚至有錯誤認知，仲話白皮書係對於呢種不正常現象作全面、系統嘅「矯枉」，亦係一國兩制總設計師鄧小平嘅思想論述。
呢番話聽到唔少人好㷫，資深傳媒人程翔都重操故業，趁齊鵬飛喺咪兜接受傳媒訪問前，質問佢點解白皮書冇咗《基本法》提到香港特區享有行政管理權呢點？齊最初堅稱白皮書有呢句，程翔即刻將原句讀一次狙擊，齊最後辯稱就算只講一國兩制，唔代表冇咗「高度自治、港人治港」，明顯被K.O.。