鄭秀文（Sammi）五年沒在紅館開騷，昨日公開發售12月舉行的十場「Touch Mi世界巡迴演唱會」門票，記者發現多個售票處都滿佈南亞裔人，其中尖沙嘴通利琴行售票處排首33位都是南亞裔人，臨開售前有疑似頭目分錢給他們買飛，排第40幾位的張小姐僅買到中價票感失望，十場門票更於100分鐘被秒殺一空。
本報收到大批讀者投訴，指多個售票處的龍頭都被南亞裔人佔領，有人打尖，隊頭又有人買黃牛飛，網友更挖苦主辦機構：「東亞娛樂退出，演唱會由南亞娛樂公司製作。」甚至封Sammi做「南亞女神」，淘寶網則有大量飛出售，但不知真偽。
元旦加兩場
昨午Sammi在西九為個唱舉行記者會，以印第安羽毛型look登場，大會宣佈加開明年1月1及2日兩場共12場，Sammi說：「好抱歉，知道大家俾黃牛逼到好緊，希望黃牛黨留番啲畀正常市民去買，有時好無奈，其實冇乜做到，唯一盡力做好個騷。」會否再加場破自己16場紀錄？她說：「𠵱家心態完全冇破紀錄，鬥乜？都冇嘢要爭。」
對於售票處排頭逾30位都是南亞裔人，Sammi說：「大家都知乜事，都係黃牛黨，如果真正支持我嘅歌迷睇唔到，我真係好心痛，自己抱四個字開演唱會：感恩、謙卑，千祈唔好有驕傲心。」對於淘寶有飛賣，Sammi呼籲：「大家小心黃牛，公司都唔夠飛，佢哋何來有咁多飛在手？」
同安仔爭飛
問到許志安有幾多張飛？Sammi笑說：「原本公司預咗少少畀佢，都俾我擸咗大部份，我哋自己嘢喺屋企拆掂，放心唔會打交。」會否搵安仔做嘉賓？她拒絕：「唔好搞呢啲嘢，工作還工作，屋企還屋企，睇就點都會嚟支持，又陪我做運動，佢都要減肥。」
採訪：溫敏芝、文國駿
攝影：陳順禎
【場數越多越爆】
除黃子華的棟篤笑外，演唱會陸續有來，由張學友、容祖兒等演出的張耀榮紀念騷均一票難求，周柏豪和張敬軒就幾近爆滿，至於得四首歌的鄭俊弘騷仍未公開發售，令人熱切期待他的賣座情況。
