官恩娜（Ella）新歌《眼淚極黑》MV俾網友惡搞，明明係一個男人，卻扮Ella嘅表情動作拍MV擺上網，騎呢到令人噴飯，Ella噚日接受電話訪問話：「我睇咗覺得幾好笑，佢扮得幾傳神，跟番晒我嘅動作，如果佢戴埋長頭髮就更加似，不過我啲衫太低胸，佢好難着到囉。」
開拓網上市場
Ella多謝網友咁有心，仲話自己噚日出新歌《共勉之》，着婚紗拍MV，笑言網友可以考慮扮佢拍埋MV：「歡迎多啲網友扮我，自己都搞咗個網上channel，除咗請歌手朋友上嚟傾偈、彈結他，我仲會分享護膚、化妝心得，開拓網上市場。」係咪𠵱家少人睇電視，想吸納多啲網迷呢？Ella話：「𠵱家網上成為主要資訊，自己都好鍾意上網，我個channel瀏覽人次過咗300萬，覺得好開心。」會唔會貼性感相吸客？Ella哈哈大笑：「我都唔係行性感，費事趕客。」
撰文：馮仁昭
