創科實業（669）行政總裁Joseph Galli做乜事拎住個電鋸周圍舞呢？唔通佢想扮電鋸殺人狂？
實情係新產品帶動公司盈利增長，Joseph噚日高興到要粉墨登場示範呢個電鋸新產品。
佢手持呢款Milwaukee M18 Fuel圓電鋸，開足摩打做出鏟除嘅姿勢，仲配埋對白，話要「cut the competitor」，強調唔怕競爭對手打價格戰促銷。
創科嘅新產品的確唔平，以新圓電鋸為例，由於更耐用，售價高達399美元（約3,110港元），較傳統無線電鋸259美元，同埋有線電鋸99美元都要貴。
不過，Joseph就期望呢個新產品，今年可以為公司帶來3億美元收入。事實上，創科上半年收入增加一成，當中新產品佔收入貢獻就有三分一。