817大遊行結果都有十萬八萬人參加，以人數計，成績不俗，主辦單位可以向上頭交到差咯。「2017普選大遊行籌委會」賣全版廣告宣稱「大會統計遊行人數為193000」，警方公佈遊行最高人數係11.06萬，即宣稱人數之57.3%，好俾面喇，上次七一遊行時，大會宣稱人數有51萬，警方公佈最高人數係9.86萬，得番19.3%咋，如果問警方為何上次將宣稱人數打2折，今次817只打6折？警方對明報講：「有人出發即走」，即係話部份817遊行人士一離開維園就鬆人，「完成任務」。
港大葉兆輝教授團隊在波斯富街及軍器廠街估算，817遊行有5.15萬至6.3萬人，港大民意研究計劃（鍾庭耀博士）在軒尼詩道與軍器廠街交界行人天橋估算，有7.9萬至8.8萬人，兩位學者嘅估算與宣稱人數相比，分別係26.7-32.6%（葉）及40.9%-45.6%（鍾），以比例計，遠高於葉鍾對七一遊行人數嘅估算，明益周融啦，但文匯報依然唔領情，在8月19日發表來論大駡：「鍾庭耀須交代是否因政治需要『踩低』大遊行數字」，想笑死人咩。
本欄素來以鍾庭耀估算遊行人數為準，因此相信七一遊行人數有17.2萬，817遊行有8.8萬，建制派為咗817宣傳不遺餘力，搵齊不同社團（多到數唔清）及各大商會、專業團體支持，有八萬幾人上街，算係咁，銅鑼灣飲食業應該歡迎多啲同類遊行㖭，餐飲界名人黃家和話每次遊行（指泛民主派的），總會令銅鑼灣飲食生意下跌六至七成，但今次就令同區飲食生意大旺場，爆到瀉，因為好多社團包場包廳吖嘛。住在銅鑼灣區嘅富翁C素來與退休高官有交往，對「佔中」一事，持反對態度，但佢對政治亦好似不少香港人一樣，「不敢涉及，以免惹上是非」，總之搵錢我自為之，眾人之事莫理。星期日遊行下午，佢到天后站附近，前百樂戲院附近相熟食肆食飯，到咗現場，就發覺凡穿紅衣T恤有社團名稱嘅，就可以食飯唔駛俾錢，還有一名中年男子漢在現場派現金。富翁C笑住講：「我唔係想攞錢，不過我着住件無字白T恤，就搵唔到位啫！」跟住講：「泛民邊度有得揮呀，莫財到唔恨，參加泛民遊行連食飯錢都冇嘅！」咁又唔係個個遊行皆為錢，中貿林在七一參加遊行，817又參加遊行，行到身水身汗，買水飲都係用自己錢。馬主C傳來圖片，與朋友遊行行得好高興，亦有記者Y傳來下午2時左右嘅渣甸坊街道圖，標題係「水靜河飛」，香港果真意見紛紜。