踏入暑假尾聲，一堆強勁BD𠵱家先發力，繼本周《美國隊長2》，跟手仲有《蜘蛛俠2》同《哥斯拉》，屋企有排唔安寧。講番隻《美國隊長2》，Marvel想拍出新意，上集用戰爭片嚟包裝，搞到龍叔叔喺戲院瞓着幾次，有一半以上睇過嘅人都狂呻中晒伏，心諗呢個系列頭炮都咁失敗，續集好大機會胎死腹中。好在Marvel肯聽取民意，玩番最耍家嘅動作特技feel，續集狂加CG同大場面爆炸，加上故事跟神盾局有莫大關連，單眼局長森姆積遜同黑寡婦施嘉莉祖安遜，由過往大配角齊齊變成主角，仲有好戲之人羅拔烈福做反派，成套戲由官能刺激到劇情張力，有番一級片水準，睇得好過癮。
欠製作特輯 粉絲失望
至於BD表現同樣令人滿意，就算以港版碟試機，聲畫水準都好過《復仇者》多多聲，畫面流量最高達到每秒26.6MB，相當實淨利落，戴着3D眼鏡睇連環動態場面，也不致流晒眼水。最叫人興奮是音效，DTS Ture HD 7.1，聲音流量每秒最高達5.9MB，分析力極好，幾幕盾牌劃空飛過的高頻音效，清脆得可以作試機場面；中段槍手狂掃雪佛蘭，子彈聲亦相當到位，不會一味得個嘈字。及至大鐵鎚狂敲裝甲車，重低音更係震到入心，若果家中行「雙十」的話（Dual Subwoofer），真係會有地震feel！
結尾例牌有彩蛋場面，兩段短片分別交代續集的反派人物，可惜港版BD不設任何bonus及製作特輯，Marvel迷應該有點意猶未盡。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
