皇家馬德里教練安察洛堤真係一流嘅打工仔，無論老闆畀啲咩難題佢，佢都冇怨言，仲搞得掂。上季，會長佩雷斯塞個加里夫巴利畀肥安，今季就打孖上，一個卻奧斯唔夠，仲嚟多個占士洛迪古斯。
仲記得上季皇馬又係搶晒風頭，破世界紀錄買個巴利返嚟，打造「兩億齊飛」。喺佩雷斯心目中，搶到巴塞風頭，兼繼續壯大皇馬聲勢，咁佢已經達到目的，至於巴利擺咩位、用咩戰術佢就唔會理，塞晒畀肥安諗掂佢。肥安又好嘢喎，將迪馬利亞改踢中場中，將個翼鋒位讓畀巴利。咁做唔單止皆大歡喜，仲幫皇馬攞埋第10個歐聯冠軍。
為咗安置有上冇落嘅兩億齊飛，肥安上季唔要進攻中場，放棄奧斯爾，由4-2-3-1轉踢4-3-3。如果小弟係肥安，梗係想鬆口氣，繼續用番上季嗰套，但可惜佢遇着個瘋狂老闆。明明上季搞咗個冇攻中嘅陣式出嚟，今夏佩雷斯就走去買個踢攻中嘅占士洛迪古斯返嚟，認真大整蠱！
或者肥安都知，皇馬教練份糧包埋應付老闆呢啲超難問題，所以冇怨過任何嘢，重新執過隊波，轉番4-2-3-1，將卻奧斯安排踢防中，同莫迪歷拍檔，占士洛迪古斯、C朗同巴利就支援賓施馬去進攻。小弟對肥安嘅執教能力好有信心，但為迪馬利亞感到可惜，佢喺皇馬有功又有勞，上季已經委屈踢中場中，今季唔通要再轉型踢右閘咩？文：咖喱
識睇，一定係睇足英台【英波Live】：
http://soccer.appledaily.com
http://bit.ly/engballlive