全體立法會議員今日去深圳見京官，泛民陣營事前梗係要傾清楚，上到深圳點樣應對，以免畀阿爺擺上枱！八方聽聞，原來泛民唔止要傾點樣部署參加座談會，連開完會後食唔食主辦單位安排嘅「便餐」，都要傾一餐，包括留低享用定係唔食好？泛民要綑綁一齊食，定係各黨派自行決定？最後各黨派為食唔食呢餐「便餐」傾咗個共識，就係一齊食埋先走人！
有泛民中人話呀，食唔食「便餐」都搞咁多嘢，無非係怕有人食、有人唔食，留低食嗰班又會畀人砌！可見今次泛民見京官，幾咁小心翼翼！但有時啲嘢好難講，萬一又有泛民入唔到境，呢餐「便餐」食唔食得成都有變數！