黃芷晴自從香港電視因發牌夢碎後，所有拍劇等工作都受影響。好在芷晴本身讀書時係選修設計，就算入咗行拍戲，都依然有做設計宣傳單張工作，近幾年仲開始用滴膠整飾物。早幾日一身Hip Hop造型嘅芷晴，喺樂富兆基創意書院搞嘅市集內擺檔賣自家製首飾，每次有客人走埋嚟，佢都好殷勤咁介紹，就算個客左揀右揀，佢都好貼心同有耐性畀意見，而現場嘅人都冇發覺佢就係黃日華個女。
冀3年內開舖
芷晴話喺市集擺檔需要幾日時間做準備，佢話：「我事前會集齊平時搜羅到嘅得意產品，亦會自己親手做100%原創飾物，近年我自學用滴膠創作飾物，顧客反應都好好。」其實芷晴有自家品牌「oh my deer」，主要係喺網上銷售，同埋喺朋友舖頭寄賣，芷晴話：「好開心自己設計嘅嘢有人鍾意，品牌已經擁有一班fans，好多人都話想睇到多啲實物產品，我希望三年內開到自己舖頭。」參加市集擺檔，芷晴覺得最大得着係識到一班好朋友。
撰文：馮仁昭