近排樓市又升到㷫烚烚，唔少名人揸住嘅物業都升晒值。好似賭王何鴻燊長房女兒何超雄，就出晒名鍾意投資買樓，喺物業市場經常買買賣賣，地產界消息話，何超雄揸住嘅大坑名門2座高層A單位，聽聞最新以3,250萬元賣出咗，個單位實用面積有成1,387方呎，呎價2.34萬元。
何超雄05年用2,915萬買呢個單位，賬面有3球幾落袋，之但係，相比同期買入，今年賣出嘅單位升幅就輸咗成條街，得嗰一成多少少。拎個大角嘴一號銀海做例，今個月屋苑一個中層自製相連單位，以4,980萬元賣出，業主同樣05年入貨，當年入貨價3,379萬元，9年賺咗1,601萬元，升咗四成七。不過，何超雄手頭嘅貨一大籮，賬面都賺唔少。