睇咗咁耐《華爾街日報》（WSJ），噚日竟然再罕有地貼港股，今次有幸被揀中嘅係中國動向（3818）。阿里就上市，要喺香港搵影子股，其中一隻最直接嘅就係中國動向。呢隻體育用品股早於2011年就入股阿里0.3%股權，當時阿里以400億美元市值入賬。
WSJ就同佢計數，如果阿里以2,000億美元上市，咁中國動向持有嘅阿里股份水漲船高，估值約48億元。睇埋負債表，至去年底，拎住cash、理財產品、其他投資，共約69億元。再加埋本身業務估值約15億元，三樣加埋已經有132億元，以噚日收市時市值92億元，股價即係仲有43%潛在升幅，目標價去到2.38元。雖然好多大行都計咗類似嘅數，不過今日分析呢隻股嘅係全球地位超然嘅WSJ！要知呢份報紙好少貼股，對上一次我有印象嘅，應該要數到2月時貼舜宇光學（2382），至今累積升幅70%。一份國際大報拎住個招牌，貼股一係唔推，一推就要中！今次WSJ寫到話，隻股點計都係抵，證明佢極度有信心。中國動向今日出業績，你實會諗業績差點計先？首先中國動向上年係板塊大品牌入面，唯一一隻有賺，盈利增19%，加埋世界盃效應，照計唔會太差。再者，正如WSJ所講，就算中國動向業務價值跌到去零，佢估值都仍然高過市值。所以如果業績差都唔會輸，業績靚的話，就係bonus。
Fifi
http://www.facebook.com/lovefrystock
本欄逢周二、四刊出