柯震東同房祖名涉嫌吸毒一案廣受關注，網民不單落力改圖抽水，就連淘寶商家都抽埋一份。央視日前播出柯震東穿着藍黃色囚衣哭着認錯的片段，淘寶網即出現商家出售柯震東所穿的同款囚衣，至少有近四十個商家出售囚衣，最平5元人民幣就有交易。
不過，咁多商家賣又點，十居其九都係「零」成交，只有其中一間提供多個男、女裝不同尺碼並號稱「獨家發售」的商家，有22宗成交紀錄，買家近八成都是男性，唔通佢哋以為着咗套衫就會變做柯震東?
相信商家咁抽水法，柯震東粉絲都唔好受。所以部份商家都喺商品有特別聲明：「賣衣服本無惡意，請柯震東粉絲們冷靜對待。」更有商家邊賺錢邊說教，話「希望大家在穿上本套裝娛樂的同時，告誡自己不要觸碰法律這張網！」
華華噚日見到淘寶網香港地區業務主管呂紹勇，當然問吓佢係咪好多人買呢款囚衣，不過佢就冇回應。華華有個朋友以前就成日講：「喺淘寶，乜都可以搵到！」以前華華唔信， 𠵱家就信喇！