張家輝近年總演沉重角色，不是黑幫、警察，就是操肌拳手、活在鬼影中。新作難得和愛情有關。講到愛，結婚11年的張家輝，講明不信有情飲水飽，談情要吃飯，有屋住才似家；不過，他的愛情和麵包，黃金比例是6:4，仍然是愛情比重大些。自認homesick的張家輝，在香港、留在家吃碗飯就滿足，「一返到屋企就OK，總之一返到香港，臭嘅，我都鍾意！」
撰文：林妙萍
攝影：郭賢興 造型：鄧卓嶽
髮型：Jeff Wu 化妝：Midco Chu
張家輝非常勤力兼多產，每年總有三四套片上。今年第三套的新片《失戀急讓》，他飾演地產經紀，為層樓和鄭秀文、Angelababy等一齊生活。前幾套片都打打殺殺、拳拳到肉，到底操肌難還是談情難？「工序上是大同小異，情緒上有唔同，但功夫係一樣，問題係功夫打響邊一個位。」
有愛才完整
今次的功夫雖然要打在愛情上，但終究是張家輝鍾情的劇情片。講到愛，眼前真是一幅鐵漢柔情的畫面，「愛情好重要！係人生中不可缺少嘅泉源，有愛情嘅人，先更完整！」
張家輝和關詠荷結婚超過10年，兩人的愛情十分實在，他覺得情人節、生日炮製大龍鳳式浪漫，不及日常生活的一句話，「有啲事係唔需要做出嚟，一句說話都可以直插心房、打中死穴。」上一次說「我愛你」，何時？「Everyday啦！我對我太太、女兒講，你哋估唔到我幾時會問佢哋，可能係佢食飯時，可能係佢做功課時，或者佢喊緊、發緊脾氣時，我都無端端插一句：『咁你愛唔愛我箒～』，佢就答：『愛~』，之後又做番自己事囉，真係唔好浪費呢句『我愛你』。」浪漫不是情人專利，張家輝、關詠荷和8歲女兒張童（Brittany），分享三人世界的愛。
有家庭就有開支，有愛也要有錢，家輝也一樣坦白，「你話，有情飲水飽；我就覺得，水呢，係點飲都唔會飽嘅。我只相信，貧賤夫妻百事哀，但你話我睇錢睇得好重咩？我又唔係，應該係六四咁分，愛情係60%，麵包就四成啦。」
夢想是假的
早前有報道，現時普通上班族，平均要14年不吃不花錢，才能夠儲到首期上車。家輝首次置業，是入了TVB兩三年後，方便返工，買了清水灣，慢慢有自己的安樂窩。他的新片也反映香港高樓價這個瘋狂現實，他很感慨，「樓價已經超出了一個常人能夠實現的夢想，我覺得𠵱家後生仔真係冇乜可能買到。」
家輝今年憑《激戰》封金像獎影帝，連導演夢都在《盂蘭神功》圓了，演藝人生的下一個夢想是甚麼？46歲的張家輝沒有設定更高更遠更大，他只想腳踏實地，一步步向前行，「其實我冇乜目標，可能我從小就覺得，夢想呢啲，係假嘅；我都冇乜理想。總之，有咩放響我眼前，我就先將佢做好。」妒忌是大部份人的致命傷，做好本分才最重要，「你唯一可以為你自己好嘅事，只有一件事，就係做好你自己。如果盲目咁妒忌其他人叻，就係一種妒忌；你睇到人地叻，而去學習、改進，就唔係妒忌。」
臭香港 三天就想家
長年在外拍片，張家輝原來有嚴重思「香」病，一離開香港就會心掛掛，容忍度以三天為限。之後，就會開始坐立不安、發𤷪𤺧，再好的酒店只想住三日，再好的西餐也只能吃三日，「我一返到屋企就OK，我係一個好怕坐飛機、好怕住酒店嘅人，我係思鄉病好嚴重。總之，要香港啦！一落飛機，就算我聞到臭，都係香嘅；人哋話，『喂，香港原來係臭㗎喎』，我話，係呀，香港係臭嘅，臭嘅，我都鍾意。」
更多精采時尚內容，盡在 http://add.appledaily.com。