巴西喺上個月世盃災難性出局之後，足總搵咗鄧加翻兜接手國家隊。新人事新作風，鄧加喺周二公佈佢重返國家隊後第一份名單，結果有13個世盃成員都Out咗，不過試多啲新面孔之餘，鋒線都仲係要靠啱啱傷癒嘅尼馬。
前國家隊中場鄧加之前喺06至10年執教巴西，喺4年前世盃決賽周8強出局之後冇耐就被巴西足總辭退。4年後巴西喺世盃史無前例輸得咁慘，喺冇乜人願意接手呢個燙手山芋嘅情況下，足總最後搵咗鄧加再做主帥。
鄧加喺周二公佈22人大軍名單，備戰嚟緊對哥倫比亞同厄瓜多爾嘅兩場友賽。名單人面全非，5個喺今夏世盃首戰正選披甲嘅後防球員，只係剩番大衛雷斯有份。門將施薩索拉斯已經宣佈咗退出國家隊，日前亦轉投咗賓菲加；加上丹尼爾、馬些路同最近受咗傷嘅堤亞高施華都冇入選，取而代之嘅有菲臘路爾斯、馬昆奴斯哥利亞同埋祖奧米蘭達。中場方面鄧加揀咗幾個巴甲兵，利物浦嘅菲臘比古天奴亦獲得重召，佢至今都只係得1頂國家隊喼帽。
前鋒仍要靠尼馬
前鋒可能係鄧加最頭痕嘅地方，球迷喺世盃期間炮轟費特真係夠廢，佢亦冇癮，決賽周後宣佈唔再代表國家隊。之不過巴西呢期真係冇乜好前鋒啱使，鄧加諗過度過都係決定徵召啱啱先腰傷好番嘅尼馬，同埋都有份出戰世盃嘅侯克，剩返一位前鋒係明尼路嘅迪亞高泰達利，但原來佢係3個射手最老一個，已經29歲，歷來曾5次代表巴西上陣。
識睇，一定係睇足英台【英波Live】：
http://soccer.appledaily.com
http://bit.ly/engballlive