鮑爾默今年2月冇做微軟嘅CEO，家陣仲連公司董事職務都要辭退埋，要專心「揸快艇」喎。
講緊係NBA嗰隻洛杉磯快艇！快艇前班主史達寧上季因種族歧視風波，被勒令終身冇得參加NBA活動，兼被迫賣盤。史達寧前妻舒妮結果以20億美元作價，將快艇賣俾鮑爾默；雖然史達寧上訴，但鮑爾默上周已成功成為快艇班主。
鮑爾默向微軟CEO納德拉發公開信，話自己成為快艇新班主，又要教書又要讀書，仲有公職，好多嘢搞，實在冇時間兼顧微軟董事職務；但佢話咁唔代表要斬斷同微軟嘅關係，話晒自己34年來流住微軟嘅血，以後都會繼續流。
佢唔係亂講㗎，鮑爾默仲揸住微軟4%股權，價值約151億美元，仲多過創辦人蓋茨，係微軟最大個人股東。