民主黨主席劉慧卿平時唔聲唔聲，分分鐘禾稈冚珍珠。唔好會錯意，八方講緊嘅係卿姐嘅資產啫！卿姐任立法會議員多年嚟，利益申報時都話自己冇物業喺手，但係早幾日，佢就更新咗登記冊，申報佢喺東涌有層樓用嚟出租。
游過水覺得環境唔錯
八方翻查過，原來自00年第二屆立法會至今，卿姐一直都申報自己係冇樓人士，當然根據立法會嘅規定，議員自己住緊嗰層樓，就唔計數啦。既然卿姐多年來似乎冇乜點買賣過樓，因乜突然間會喺東涌買層樓放租呢？唔通突然多錢到冇地方使？
身在海外度假中嘅卿姐越洋回覆八方，佢話因為佢一位住喺東涌嘅親戚，推介佢買東涌映灣園，佢自己亦去過嗰度游水，覺得環境都唔錯，於是決定買番個單位喺嗰度，當係投資。而佢買嗰個單位本身就有人租緊，所以佢買咗後亦續租俾嗰個人，層樓買咗460萬。
八方上網睇過，嗰個屋苑460萬嘅單位，實用面積應該約500幾呎。多得狼英遏抑樓市措施乏力，搞到樓市租金仍然高企，卿姐呢個時候放租應該相當和味，估唔到佢都咁眉精眼企！