當券商的恒指目標都可以吹到上五萬點的時候，股份上升，似乎唔再需要咩具體理由。以百麗（1880）為例，其基本因素無大改善，但該股由6月中至今，已累漲近三成。嚴重落後的恒指成份股，在芬佬追緊恒指weighting的情況下，都稍見反彈。唔怪得已無晒catalyst的利豐（494），最近市場的詢問度亦有改善迹象。
市場上很多所謂turnaround，其實並唔係業務復蘇。如陷入谷底多年的百貨股百盛（3368），當全世界幾乎一致睇「sell」的情況下，它上半年卻交出了一份遠超預期的業績，半年盈利達全年預測七成。百盛57間百貨店中，仲有17間蝕緊錢，表現好轉，唔係生意多咗，而是公司輸咗N年錢，終於有百貨店可以在唔使罰租畀業主的情況下，關門大吉，真正做到「輸少當贏」。公司仲擺明會繼續用呢個策略，以關舖為未來主要增長「亮點」之一。
百盛有趣的地方，是公司以往經常被投資界詬病，指大部份分店都是租回來，非自置物業，不及其他百貨股有「磚頭」咁值錢。但現時卻由於百盛無自置舖，才可以無包袱地cut loss。弱點忽然變賣點，相當諷刺。
海迪