15個泛主派議員，今日跟進立法會大隊，坐車北上去深圳同港澳辦主任王光亞以及基本法委員會主任李飛會面，當中包括唔少無證人士，民主黨何俊仁都係其中一個。
一如長毛同何秀蘭，噚日鐵頭仁都特登去咗上環中旅社，諗住申請一次性回鄉證，希望名正言順返大陸傾政改。相信鐵頭仁因為太耐冇申請過回鄉證，所以去到中旅社，一切都覺得好新奇，例如要即場磅水影相，佢都大吃一驚咁，笑笑口話影相要40蚊都幾貴！事實上佢寓申請證件於視察民情，主動了解負責影相嗰位阿姐嘅工作情況，阿姐都話日日猛叫人除眼鏡影相兼唔好露齒笑，都會講到口乾㗎！
至於鐵頭仁除咗眼鏡證件look（圖），連佢都自嘲個樣好鬼「薯」。至於係咪成功申請到？就要留待稍後攞證時下回分解。