房東涉毒在北京被捕，震驚娛樂圈，圈中人議論紛紛，希望給予他們改過自新機會。
孫耀威：
佢哋上個月分別嚟過我上海間club玩，我哋好多共同朋友，聯絡緊，都唔知可以做啲乜，希望可以畀機會佢哋重新改過，呢單嘢衰咗㗎喇一定。佢哋係好人，只係年輕人有時候軟弱，做錯事。呢樣嘢（吸毒）已經out咗，你飲多支啤酒，都可以好high。
龍小菌：
佢（柯震東）大好前途，拍完《那些年》之後有咁多人識。所以我成日提醒自己，無論自己地位去到幾高都好，都唔可以忘記當初點樣入呢行發展，因為藝人身份，可能會有人以自己為榜樣。
任達華：
小朋友應該畀機會，發生事可以啟發到思想，做人應該勇於面對一切，比其他人有正當能量。
陳偉霆：
覺得有啲可惜，佢哋喺工作上花咗好多工夫，有好成績，相信佢哋呢段時間會崩潰，好大壓力。每個人有改過機會，大家係年輕人，將來路好長，大家畀機會佢。
林峯：
人哋嘅事唔想講咁多，自己未同成龍合作過，希望事件可以解決，最重要係改過。喺內地拍劇時未試過受引誘，因為自己真係冇時間。
林建明：
祖名好乖、孝順、踏實。柯震東個樣好純好乖。唔好做壞事，人生有好多經歷，唔會一帆風順，經一事長一智。祖名係星二代，作為前輩要關心。大麻喺外地有啲地方係合法，唔係叫吸毒，唔好講到咁差，唔好扭曲。佢哋需要心靈慰藉，人實會做錯事，要畀機會。
葉世榮：
希望佢哋唔好再咁樣，其實全世界都有呢啲引誘，睇自己點決定。忠告所有年輕人，唔好依賴某啲嘢，面對壓力困難麻醉自己唔係好方法，要積極面對。
楊千嬅：
冇留意條片，人生係有唔同際遇，總之我唔方便去評論，人生有唔同階段學習、經歷、成長方式，繼續向前行，自己領悟。至於教仔方面，我唔會針對某件事教育，係教價值觀，同自我判斷能力。