前排爆出家暴嘅可嵐，𠵱家搞緊離婚手續，之不過話晒擔起頭家，照顧3歲大嘅囝囝，當務之急梗係要努力工作喇！
朝八晚五教全日
噚日有讀者報料話可嵐喺九龍灣嘅基督教勵行會教人煮咖啡，馮仁昭咪打電話畀佢傾吓偈，可嵐話查實已經教咗一段時間，佢話：「我暫時得呢一間，因為有好多機構要認證個咖啡師牌，𠵱家叫做多咗個收入！」講到會唔會出去開班私人教授，可嵐話：「我嘅老師都有叫我出去教，如果真係有好多人想學，都會尊重老師同番佢溝通，𠵱家佢跟番我嘅時間表去安排，一冇工作就教班！」可嵐話好似今個星期係教四日，如果係全日就朝早8點半教到下晝5點半，佢仲話：「呢個安排都可以，始終照顧小朋友開支好大，乜都要做，雖然係好辛苦，但係可以用到自己嘅技能，又幫自己搵到基本開支，如果真係頂唔順咪飲咖啡囉！」
𠵱家有60個學生嘅可嵐，得閒都會同學生分享吓心事，佢話：「有啲同學見到報紙先知，我哋都會分享同鼓勵吓對方，遇到有學生唔開心，我會叫佢努力，冇嘢係冇唔可以！」
撰文：馮仁昭