星級基金經理陸東舊年初自拆招牌，以市場係唔理性為由，將佢成日掛喺口邊嘅恒指合理值講成「冇Q用」，陸東從此亦好少預測恒指目標，但上月底當大市喺二萬四關口時，佢又技癢兼做理性分析，預測恒指過唔到二萬五，結果唔夠一個月，佢嘅預測就「燈」咗。今次之後，斷估冇乜人再敢估恒指目標價!
陸東當時嘅理據係，企業盈利配合唔到、加上樓市見頂，所以個市冇再大升可能，但恒指噚日收市終於企穩二萬五樓上，靠嘅正正就係藍籌業績夠標青，兼且地產股追落後，今次真係人算不如天算嘞。
老實講，近幾年投資界都已經好少望住指數炒，業界睇市各師各法。基金經理黃國英（Alex）玩嘅係以揀股為主嘅打游擊，話近兩年宏觀條件同重磅股表現，同大市已經脫晒鈎，估指數只能靠彩數，「就好似射12碼咁，一係中、一係唔中，只係有啲人唔中嘅機會高啲咁解啫。」佢堅信，就算一年後指數冇升到，揀中股票照樣可以發達。
股評人界亦唔睇指數。胡孟青（青姐）認為，喺政策市下指數只會焗上，恒指隨時炒高到二萬八，睇基本因素係多餘。