巴塞隆拿同皇家馬德里今夏都使過億歐元擴軍，新一季西甲就肯定有排鬥。巴塞周一甘柏盃主場出擊，對住墨西哥球隊利昂，輕鬆以6:0大勝。尼馬、美斯入兩粒唔出奇，蘇亞雷斯亦都後備上陣15分鐘，雖然冇波入，但呢個南美三叉戟陣真係引死人。
派6蛋眾新兵對辦
利昂上季只排墨超第8位，加上今次作客魯營亦都冇咩競爭，巴塞能夠大炒都唔意外。而尼馬世盃期間俾哥倫比亞後衞辛尼加撞傷腰椎，差啲癱咁滯，好彩經過休養，似乎已經好番晒，3分鐘仲有一個靚助攻畀美斯頭槌先開紀錄。面對冇咩防守意識嘅利昂，尼馬個人梅開二度，換邊後就算派遣部份B隊成員一樣夠殺，梅尼亞入兩球，加上辛度埋齋，輕鬆咁贏6:0。
巴塞球迷真係好消息接踵而來，尼馬傷癒又有助攻又有入球，新兵好似馬菲奧、拿傑迪錫都表現對辦，不過魯營球迷最開心就係睇到蘇亞雷斯登場嘞。獲國際足協減輕禁制令，阿蘇可以跟操同友賽上陣，今仗亦喺最後15分鐘上陣，叫做畀主隊球迷開心吓。當然自咬人事件後，阿蘇接近兩個月冇比賽，狀態自然差，今仗亦冇進賬，不過球隊都好支持佢，恩尼斯達仲上載同阿蘇合照去Twitter。新任教練安歷基亦都好滿意話：「 經過收購新球員，我哋打造出一支獨一無二嘅球隊，火力非常強大，我好期待新一季比賽。」不過阿蘇禁賽令仍然維持至10月中，要喺正式比賽睇巴塞嘅南美三叉戟，仍然仲要等。
識睇，一定係睇足英台【英波Live】：
http://soccer.appledaily.com
http://bit.ly/engballlive