英超開鑼，各隊領隊都會為球隊定下本季目標。不過好有趣，英超領隊大多「妄自菲薄」：明明爭冠軍，都話目標係前4；去到中段同歐霸席位爭幾分，可能仲話自己護緊級。香港有個「怪獸聯賽」就唔同喇，個個「怪獸領隊」都有大量遠大目標，希望「旗下球員」全部做到：認字、學外語、計數、彈琴，甚至游水打波都要催谷，以達成終極目標入名校。
對小朋友來說，父母就是他們人生首個「領隊」。不過，在為「球員」訂立目標、期望時，有否考慮過「球員」的自身能力及特質？會唔會帶緊侯城，想佢爭歐聯席位？帶緊愛華頓想佢贏英超冠軍？不過香港有太多「怪獸領隊」，他們不會認為「旗下球員」係侯城，最差都肯定係曼城！故此一定要谷；甚至怕自己做咗「莫耶斯」，明明帶住曼聯，踢得差咪埋沒天份？唔谷直情有內疚感！所以每位「怪獸領隊」，係唔會畀球員有喘息機會。最恐怖係「怪獸領隊」有傳染性，而且勁過伊波拉，可透過whatsapp群組、社交媒體極速散播，一個「怪獸聯賽」就此形成。他們卻忘記了，「球員」的最重要目標，其實只是愉快、健康地成長。
英超開鑼後，還有兩周便開學。今季你為你的「球員」定了甚麼目標？不妨學英超領隊，將目標稍為定低啲，小小的「球員」，可能會成長得開心啲。
方柏翹
now足球評述員