話咁快唔夠一個月後就開鑼，馬會亦大致plan好9月14號第一戰嘅節目，賽事方面當然有例牌菜特首盃，而入場馬迷就會獲贈月曆同埋抽獎卡，有機會揭中24K包金金馬，馬會更將喺開幕禮安排130隻醒獅表演，象徵香港馬會成立130周年，認真大陣仗。
賽馬節目主持嘅人選變動，好多馬迷亦關心，去年被前男友持刀禁錮12小時，現年34歲嘅Rita陳思琦，今季被馬會Out咗，冇得再做節目。取而代之係後生一大截，公認靚女嘅楊明綸女友莎拉。其實莎拉上季已成日幫馬會拍攝節目，但都係花瓶居多，今季就真正升呢，將成為《胆識過人》即係賽馬預測嘅慣性主持，每逢賽前一晚播出，同子健及梁浩賢拍住上，姑勿論莎拉貼馬準唔準，起碼有靚女睇，相信唔少宅男都會留意。
另外最特別係前無綫新聞主播，現時活躍於各媒體嘅柳俊江，將主持《放眼馬世界》嘅清談系列節目。