日本博彩合法化法案雖然仲未通過，但係一班有意登陸日本嘅賭企已經不斷睇緊場，希望可以霸定個靚位開賭場。
而最新被睇中起賭場嘅地方，就係好多人都去過嘅東京築地市場，換言之，𠵱家啲魚檔遲啲有機會變賭枱。
彭博引述消息人士話，一直對喺日本開賭好有興趣嘅美高梅中國（2282）母公司美高梅國際酒店集團，已經將日本最大魚市場東京築地，列入佢哋興建賭場嘅目標選址之一，主要睇中築地鄰近高級購物商業區銀座，仲話集團行政總裁James Murren今年3月已經親自去到築地視察環境。
不過，日本政府話要將佔地23萬平方米嘅築地市場搬走都講咗成十幾年，最新消息就話要2016年先有機會搬得成，所以最後美高梅可唔可以如願以償喺築地度起賭場，應該仲有好多變數。