退休保障研究報告今日公佈。香港總商會總裁袁莎妮噚日同傳媒茶敍，認同香港貧富懸殊嚴重，尤其長者貧窮更要正視。佢話有時喺街上見到婆婆屈晒身喺度執紙皮，就於心不忍，會走上前拍拍婆婆膊頭，畀100蚊佢買嘢食，「我覺得香港唔應該再有老人家連溫飽都要擔心」。
憂退保增財政負擔
之不過講番退保，袁莎妮就話社會資源有限，要用喺有需要嘅人身上，唔應該人人都派，「啲錢喺邊度嚟？」佢話2034年就滿65歲，合資格申領退保，但好擔心財政負擔沉重，在座嘅年輕記者唔知屆時仲攞唔攞到，反問：「你哋唔擔心嘅咩？」八方問過同事，贊成反對退保嘅都有；有位同事仲同袁莎妮一樣，曾經畀100蚊執紙皮嘅佝僂婆婆買嘢食，就當趁年輕有能力養老，同退保理念一樣。