「個鄭融就唔啱啦，話啲團體遊行冇派錢。香港最大嗰幾份報紙，份份都影到佢哋有派錢，張融老屈報紙講大話，唔啱呀唔啱。」政治冷感分程度的話，家母毫無疑問屬最高級別，今次竟然食食吓飯論政，除咗食錯藥，我諗到唔到點解。
「你平時唔睇新聞，做咩咁關心呢件事？」果然不出我所料，真係食錯嘢，「緊係關心啦，我嗰日去遊行，飲埋茶、蝦餃燒賣任叫，落維園行一個圈，就有錢收，幾開心呀。」
「好心你就唔好為咗幾百蚊俾人利用啦。」衝動、心浮氣躁係我嘅缺點，因一時沉唔住氣唔記得咗，如果駁家中獨裁者嘴，將會帶來災難性後果。「衰仔，幾百蚊唔係錢呀？嗰時你叫我買阿信屋（759）股票，到依家都仲蝕緊呀。」散戶係世上最「愛恨分明」嘅動物，你俾佢哋嘅股票貼士，中嘅嗰啲就抹咗佢，唔中嗰啲就記一世，話知你係佢親生仔。其實，散戶們（包括我阿媽），醒吓啦，中硬嗰啲叫預言，能夠次次講中預言而我又認識嘅叫耶穌。如果我係耶穌，難道你是童貞女聖母瑪利亞？
「我咪上年底叫你沽囉，係你自己唔沽，與我何干？」最後我將心中一連串話，濃縮為這一小句。「你家吓以為我唔識嘢？我都有做功課，阿信屋越開越多，咩都有得賣，隔籬屋陳師奶嗰日仲話759賣啲米又平又靚，連家電、膠箱都有。咁多嘢賣，又多舖頭，師奶個個都去，個老闆一定賺到笑啦，我點會沽？」
嗱，好多人都係咁，以為自己見到嘅畫面，就係事實嘅全部，好似我識個網球教練，佢開班兩粒鐘教15個學生，位位收80蚊，2粒鐘收1200蚊。好多人就會話，「嘩！當你一日教6個鐘，一個月教10日，月薪咪3萬6蚊！」如果世界有咁完美，地球就唔會打波先嚟雨；港女就唔會因為嫌凍、嫌曬唔去打波；恒指日日新高；香港聽日就有普選。
「你去759係咪貪平先？」「唔平去買做咩？合味道大嗰隻杯麵，阿信屋特價6.3 元，百佳買2件，除開一件都要7.25元；同一款隻牌子花生醬，阿信屋賣美國版，22.5元，百佳賣香港版，細樽啲，要25.5元。安怡關鍵奶粉，阿信屋 750g特價99.8元；百佳多50g，賣139元」師奶真係師奶，當我股票number都唔係成日記到，佢能夠記到咁多個價錢連Gram數，呢種能力，我肯肯定我阿媽勁過聖母瑪利亞。
「你都知佢賣得平啦，咁賺得自然唔多，上年全年都只係賺2377萬。」「2000幾萬，咁都叫唔多？」喺一般師奶眼中，對100萬、1000萬根本毫無概念，總之就係多。「你聽埋先，公司毛利率雖然有29.9%，但盈利率1.3%。」見到阿媽開始夾餸，我知我講深咗，「即係話，你每俾100蚊生意佢賺，佢落袋嘅只係得1.3元。你話股價點會突然間爆上？」
「少得咁陰功。哎呀，咁即係就算我將遊行一次賺嗰200蚊俾生意阿信屋，佢都係賺到2.6元。」「吓，阿媽你得收得200蚊？嗰日最多有人派800蚊呀。」夾住條菜，在半空中條菜啲蠔油一滴、兩滴、三滴…估計阿媽呢個時候阿媽心也在流淚，慨嘆自己點解遇著一個食水咁深嘅組織。
但，我錯了。
「好在我一早已向三個人報名，當日報到三次，一共收咗600蚊。」師奶有時真係，你精佢都唔笨…得晒。至於佢最後有冇沽到阿信屋，我相信冇，因為通常散戶習慣係，當佢揸隻股跌咗兩、三成，呢個時候就係人生正面、最充滿希望之時，「一定返到家鄉嘅。」
Btw，唔記得講，我係公屋法拉利James。
by千頌C@堆填區
http://fb.com/winbigwok