泛民主派日前喺本地三份報章，夾錢登咗一個廣告，抵抗政府嘅「袋住先」輿論攻勢，廣告由一個媽媽抱住自己熟睡嘅小朋友，配上「香港人，你會為下一代帶來一個怎樣的香港？」、「袋住先等於出賣下一代」字眼，希望香港人覺醒。
呢位自稱「普通媽媽」嘅母親，噚日寫咗一段話解釋點解站出來。佢話以往甚少談政治，一心做安份守己嘅市民；最終答應拍廣告係良心呼喚：「心底裏的正義感卻告訴我，我們應該要（做）自己認為對的事。」佢話廣告見報後，自己同小朋友都被認到；朋友問佢怕不怕？佢回應話如果佢有事，香港已再唔係我哋可以居住嘅地方，站出來就係要好好守護自己懷裏嘅孩子。