星辰通信（1155）又係另一隻潛水潛到落海底嘅4G受惠股，現價比2007年高位4蚊，大跌咗80%，有半年盈喜墊底，加埋4G投入服務，全年成績單繼續靚仔，博佢翻一番。
星辰主打無線電信覆蓋系統設備同有關工程，兼新拓數字對講機。上年，星辰嚟自中移動（941）、聯通（762）同中國電信（728）三大巨頭總收入，達14.6億元人仔，幾乎係集團總收入來源。
4G優勢掂過碌蔗
隨着內地4G牌照上年底發放，星辰喺前一瓣項目嘅定單需求，已經有明顯增加。
嚟緊一段日子，仍係4G網絡投資高峯期，星辰直接對口三大巨頭，加埋4G投入優勢，應該掂過碌蔗。
又星辰新一瓣數字對講機業務，阿爺對國家安全、反恐同應急通信越嚟越重視，工信部亦隆而重之，發佈咗666號文件，設定全面性模轉數計劃。據估計，呢瓣內地市場規模，斷數百億元人仔，環球市場亦上到近千億元規模。
星辰食正頭啖湯，呢瓣帶起嚟緊半年業績單盈喜。下半年，兩瓣主打項目，繼續肥仔。
星辰上年盈利都係得687萬元人仔，但係呢一年要撥備減值近7,100萬元人仔，唔計呢啲撇銷，盈利去到8,170萬元人仔。
星辰今年步入第二春，相信唔會再好似上年咁，出現大額減值，一個來回，盈利起碼上到8,170萬元人仔，連埋行頭好景，今年純利有機會上到9,000萬元人仔，EPS0.144港元，PE由家陣69倍，跌到得番5.8倍。
又星辰喺近七年底，PB得0.3倍，博翻一番到1.6元，PB都係得0.6倍，未有耐炒過龍。
錢雋
細價股專家
本欄逢周二、三、五刊出