律師會於8月14日召開特別會員大會，以大比數通過在野派嘅三項動議，其中一項係對會長林新強投不信任票，創下108年會史紀錄。
假如議案係以51%對49%通過，在朝派還可勉強撐下去，但試睇吓啲票數分佈：
（一）不信任律師會長林新強：2392對1478票（61.8%對38.2%），通過。
（二）要求律師會發表聲明捍衞司法獨立：2747對1186票（69.8%對30.2%）通過。
（三）要求林新強收回「白皮書」言論：2574票對1367票（65.3%對34.7%），通過。
睇投票比率，三議案均以壓倒性多數通過，贊成票超過六成。律師與法治係西方概念，中國五千年歷史無此文化傳統，在香港考律師牌，以英文為正式語言，英文唔掂就唔駛慌考到牌，故此香港律師習慣用英語思維，辦事邏輯以西方標準為標準。西方文化一個重要元素係做人，特別係做專業人士，要有sense of honor（榮譽感），為個人榮譽、為專業團體榮譽，重要過為私人權位。現在林新強會長明明不受律師會會員大多數支持，一見到投票結果，就應該立即宣佈辭職啦，但林會長竟然透過律師行發表聲明話：「為了律師會的聲譽，我盡最大的努力保持律師會的團結」，言下之意，就是佢唔辭職是為了律師會好，但係卒之拖到8月19日，佢又宣佈「為了維持律師會的團結」，向會方請辭，即時生效。橫掂都係走人咯，早五日講就漂亮得多啦！
一位真正有榮譽感嘅法律界人士就係前任首席大法官李國能，以佢嘅超然地位，大可在馬場享受跑馬，對時政不發一言，明哲保身。但李官於8月15日發表文章講法治（rule of law），公開評論「白皮書」嘅英文用字administrate與法官愛國論，講及法官沒有任何主人，無論是政治上或其他方面，他們只對法律本身忠誠，他們對社會的服務在於能夠根據法律，公平及不偏不倚地判決糾紛。李官之言，擲地有聲，李官就係香港接受英語教育嘅法律界能人精英，真正明白西方法治觀念的精義：法官只對法律本身忠誠，愛國法官無公認定義。再講番林新強會長，共產黨明明講求法律為政治服務，黨大於法，林律師仲話共產黨偉大，則難以理解了。