找數定走數!全城掀起淋冰水籌款熱潮，財經、政商、體育界名人、藝人全部玩埋一份，最新連財經官員都被挑機。
股評人孫柏文與港視（1137）主席王維基噚日分別向財爺曾俊華與商務及經濟發展局局長蘇錦樑挑機，後者好似話應戰，即管睇佢哋係咪堅堅決決找數嘞。
王維基共50人接受挑戰
王維基噚日接受公民黨陳淑莊挑戰，率領港視員工，一行50人，一人拎住一個灰色膠筒一齊淋冰水，比起「超人」李嘉誠嘅紅顏知己周凱旋前日拉隊一行15人淋冰水仲要人多勢眾。
呢個活動其實唔係自己淋唔淋冰水咁簡單，最好玩，係睇被挑機嘅嗰三位人士係咪喺24小時內找數。王維基噚日淋完冰，點名向中文大學校長沈祖堯、商台首席智囊陳志雲，同埋對佢哋「恩重如山」嘅蘇錦樑下戰書。據悉，蘇錦樑今日中午會同副局長梁敬國、政治助理陳百里喺添馬公園找數。
無獨有偶，孫柏文噚日找數後就點名向財爺挑機，另外兩位就係壹傳媒（282）老闆黎智英同埋股評人胡孟青；胡孟青回覆話會找數，打算日內喺屋企浴缸或露台淋冰水。
查實呢個淋冰水籌款活動，人人都可能被點名挑機，美國總統奧巴馬早前都被人下戰書，不過佢就透過白宮表示以捐款代替淋冰水，所以大家睇唔到佢淋過痛快嘅片段，估計呢個活動喺名人效應下，在港仍會玩多一段短時間，唔知會唔會有人向CY下戰書呢？
李華華
mailto:[email protected]