上季起馬會改例，將練馬師每季成績最低要求，由13W調高至15W，對中小型馬房壓力大增。其中德國籍嘅孫達志，苦戰至煞科日先憑「威祥」贏夠15W上岸，險過剃頭。
孫達志透露，上季初及季中唔太如意，於是接受馬主朋友建議，4月10日起由薛達志改姓孫，果然手風漸順，最終多添6W毋須收警告信。
不過孫達志之前已試過有一季唔達標，佢直言自己得46歲好後生，如果新季成績跌番落去第二次不及格，未來65歲退休前，任何一季又唔達標，就會冇牌出局，情況就同李易達差唔多，自己實在「巧驚驚」。所以今季提早回港主持大局，力求盡早贏夠15W達標，唔想擔驚受怕。呢一日孫達志親自督操後，透露暑假與太太去過歐洲多國，為幾位馬主物色良駒，希望補充多些新血，壯大馬房兵力。
孫廐「包裝鬥士」上季尾打疊三捷，為孫達志畢業作過重大貢獻。孫達志話隻馬好有鬥心，上季只係初熟，仲有好大進步空間，今季有條件更上一層樓，會向一哩級際賽進軍喎！