【澳門直擊】楊千嬅破禁演出題材露骨的新歌《色惑》，SM造型配搭黑絲和皮鞭，還有價值過百萬的Burberry鱷魚皮紅色大褸襯托過百萬製作費的全新MV，靈感來自澳門的表演Taboo，昨日楊千嬅在澳門新濠天地為《色惑》舉行火辣版MV亞洲首播發佈會。
被指變哥斯拉
楊千嬅穿上隱含SM玩味的黑色連身裙，在台上大談《色惑》各種新嘗試，為了新歌減掉16磅的千嬅說：「我對自己有自信，舞台上大啲空間，早10年前未必做到。幾個造型套衫都着到，真係好感動。」講到MV入面的眼神和皮鞭，千嬅自嘲說：「對其他人嚟講可能好性感，落喺我手好似有份懲教署感覺。」發佈會結束前，千嬅跟一班在澳門新濠天地表演Taboo的男女舞蹈員合照，其中一位外籍男舞蹈員擺甫士時，他的手竟然觸及千嬅的胸部，而當時千嬅並未有任何反應。
事後千嬅接受訪問時，她否認男舞蹈員觸摸其胸部，但看到有相為證之後，她說：「唉！咁就死喇！打底厚得滯，feel唔到。」千嬅會否擔心老公丁子高見到會發火？她說：「外國人冇事嘅，門口見到就大件事，舞台上冇事，拍戲都會接觸到。」千嬅表示最近老公投訴她帶了校長角色返家，她說：「佢話我講嘢冇尾音，係隻大碼哥斯拉！」講到皮鞭，千嬅自誇說：「屋企冇，我冇呢方面興趣，但我知自己有呢方面潛力，不過唔想咁教仔女，所以屋企冇藤條。」
另外，千嬅未能出席稍後《新城國語力頒獎禮》，新城台長朱明銳專程到澳門送上新城國語力亞洲女歌手和突破舞台大獎予楊千嬅。
採訪：黃曉妍
攝影：陳慧安
