反佔中遊行前菲菲明明收到風，遊行一日袋800蚊，點知最後好多人都係得兩三百。出賣自己立場仲要俾人食夾棍，唔好彩唔識答問題還俾人捉咗去上電視。財金界人物入面，最無奈嗰個應該係理文造紙（2314）。一個遊行人士答記者問題時，話嗰日係去「購物」，結果俾理文造紙行政總裁李文斌拉走。李文斌幾時做埋導遊？
香港已經冇眼睇，揀潛力爆升股振奮吓好過。馬斯葛（136）呢隻就有potential。馬斯葛個office就喺馬寶道某一棟商業中心，唔知點解，呢期位於同一座大廈嘅上市公司，都好離奇地勁炒。好似漢基（412）由6月起步，越升越急，由15億元市值，兩個幾月就炒到而家66億元。民豐（279）最近都爆升，噚日再升15%。叁龍（329）最近嗰兩支大陽燭就夠霸氣啦。咁啱得咁橋？風水好？無理由吧。點解？你懂的。
值得一提係，馬斯葛曾經傾過賣盤畀國盛投資（1227），雖賣唔成但咁肯定咗大股東想賣殼。對大股東來講，要賣當然要炒上去先賣。公司上年已完成配股，之後又開始賣台灣資產套現，將隻股執到乾乾淨淨，極似賣殼前舉動。馬斯葛而家整裝待發，市值26億元，如以呢座大廈其他上市公司咁炒法，以60億元市值為目標唔過份，即係每股約0.24元，穿0.1元止蝕。
Fifi
http://www.facebook.com/lovefrystock
本欄逢周二、四刊出