封塵已久嘅中移動（941）上周出業績。一出呢份盈利倒退嘅業績，股價就回復當年之勇係咁衝上。我走去問人點解，答案好多個，全部都係捉到鹿唔識脫角。我見到唯一中point嘅分析，就係我隔籬青姐胡孟青噚日篇文嘅睇法。青姐噚日講啲乜？就係關於中移動4G嘅業務。
係，我有4G都唔用，不過原因係香港3G網絡得。中移動同大陸政府，當年俾啲外國勢力（花旗國掠水顧問）𠱁咗落叠，諗住可以整個電訊大躍進，所以就大搞土法鍊3G，搞埋啲國產TD SCDMA。點知係唔work，極慢，劣評如潮，慢到平均收費只高2G少少先上到客，仲要啲客每日出街一有wifi，就唔用3G網絡。即係實際上，你可以當中移動根本冇流動上網服務。
今次唔同，中移動、大陸政府痛定思痛，喺4G呢轉就用晒來佬科技，不過就高調話係自己嘢，去安撫啲憤青，成功偷龍轉鳳。咁即係近8億用戶會一吓由冇流動上網變有。4G網絡有用嘅程度，令4G就算收貴過土製3G一倍都好，口碑好到係今年7月比6月上客量，單月升百分之四十，到2,000萬戶。
去到呢度，你會問：「買4G，瞓落邊隻先？」最有盈利爆升，坐足成個4G浪嘅，係一間淨係殼價、手上淨現金同啲向全球最大網絡設備供應商嘅應收賬，每股已超現價嘅摩比發展（947）。呢間喺深圳嘅高科技民企，做流動電訊發射站裏面零件，包括4G最key嘅天線。
明日業績後再跟進
就係咁，2012年受大陸電訊業「被喝停」同歐洲嘅歐債危機之害，轉虧蝕。2013年因4G服務開始投資下連發盈喜，不過市場因2012年同3G嗰轉受過傷，令到佢近半年冇升勢，資產負債表極平。
一句到尾，係咪一注獨贏或不問價追先？呢一刻，我一定睇好，不過摩比發展會喺明日出業績，後日見分析員同財演，到時我就會有上升目標價。
孫柏文
獨立股評人
http://facebook.com/shuen
本欄逢周二刊出