陳木勝監製、關信輝導演嘅《5個小孩的校長》前晚煞科，兩個主要演員楊千嬅和古天樂拍完之後就一齊開香檳慶祝，着住病人衫，化咗個面青口唇白妝嘅千嬅，喺拍攝場地滿場飛，開心到不得了，咁梗係喇！可以返屋企專心湊仔！
不過，拍呢套戲千嬅同古仔都好開心，因為部戲有5個小演員，佢哋都非常得意，聽話同可愛，連面黑黑，口口聲聲話唔多歡喜小朋友嘅古仔，對住幾個鬼馬小朋友，都笑逐顏開。話說5個小演員因為就快放完暑假要返學，日前就拍埋最後一場戲收工，嗰日古仔知道班小朋友係最後一日一齊拍戲，雖然朝早已經拍完晒佢嗰部份，但係佢都冇即刻走，仲留係班房同班小朋友一齊玩，真係難得一見！
唔介意被逗下巴
當5個小演員一見到古仔，即刻大叫戲中嘅名東東哥哥，平時木無表情嘅古仔即刻變得親切溫柔，他拍拍小朋友個頭，又畀佢哋坐大髀，有小朋友從後環抱古仔，又上前逗古仔下巴，古仔亦毫不介意，開心到不得了！
千嬅發現古仔未有即時離開，還留在班房跟小朋友玩，千嬅即刻忍唔住爆料話：「唉！佢好鍾意小朋友㗎！叫佢早日成家立室啦！」
撰文：馮仁昭