假期總有完結的一天，呢一日(18號)蔡明紹、潘頓和李富，三位大師傅齊齊季內首次亮相沙田馬場，睇落塊面肥咗啲嘅應屆冠軍騎師潘頓冇操馬，轉咗去做「公關」，與葉楚航、文家良、呂健威及蘇偉賢等練馬師打交道，爭取支持。李富就有操馬，第一匹出試係李易達馬房嘅「一見鍾情」，而馬壇神童蔡明紹，則主力為師傅告東尼嘅馬踱步。
蔡明紹嘅囡囡Jessica May喺6月30日出世，紹仔由馬壇神童變頓慈父，佢話今個暑假邊度都冇去留在香港，照顧Jessica幫手餵奶，只係間唔中同太太衛文娟，帶埋女兒一家三口行吓街，本來好唔捨得掉低Jessica，打算押後一周先開操，但諗到已放假整整6星期，休息已經足夠，於是加入備戰行列。紹仔又話首日操咗7匹馬亦不算太攰，但7時過後太炎熱，感到幾辛苦。
講到今季發展時，紹仔表示會照舊替東廐馬搏殺外，仲自爆上季收鑼前，曾經同練馬師蘇偉賢講好會加強合作，亦會抽時間幫孫達志操馬；仲講明稍後等方嘉柏回港，就會向佢攞馬騎。
對於老拍檔兩屆香港盃盟主「加州萬里」，紹仔話隻馬現階段狀態循序漸進中，但佢年紀唔輕，要同質新馬抗衡，始終非易事。