近來一片妖氣之中，八方噚日睇到一個幾清新嘅廣告（圖），上面有一對母子，寫住「香港人，你會為下一代帶來一個怎樣的香港？」、「假普選，沒有選擇的一票；袋住先，等於出賣下一代。」原來呢個廣告係由50個泛民中人及團體聯署，噚日喺三份報紙刊登，陳方安生、李柱銘同佔中三子都有份。
有份聯署嘅公民黨黨魁梁家傑話，眼見政府、建制近日頻頻發功叫人「袋住先」，該黨就建議登廣告做溫馨提示，希望市民明白惟有真普選先可以拯救香港下一代。廣告費用咗約41萬元，公民黨先墊支，聯署人會夾番錢，而泛民立法會議員嘅「參考價」位位6,000蚊，多多益善。
而喺一片派錢、收錢、壓價、食差價聲中進行嘅反佔中遊行亦「圓滿結束」，保普選反佔中大聯盟噚日喺唔少報章刊登全版廣告向阿爺「報數」，話大會統計遊行人數為19.3萬。經民聯都唔執輸，登報「交代」佢哋有500會員同地區人士上街；其他同鄉會亦大賣廣告「報喜」，望阿爺打賞時唔好漏咗佢哋！