中聯辦主任張曉明為政改拉票，喺政總陸續會見泛民主派議員，但噚日邀請嘅七個議會「一人黨」泛民中，只有四個出席，包括馮檢基、莫乃光、葉建源同李國麟。其他三個做乜咁唔畀面？原來梁繼昌同范國威，因為唔喺香港而未能赴會；至於街工梁耀忠（圖），點解喺香港又唔出席呢？據聞佢回覆噚日有事未能出席，反要求拍住工黨立法會議員，喺今日先一齊見張曉明。
有泛民中人笑笑口話，梁耀忠一向同工黨較為同聲同氣，梗係有理冇理都想同工黨一齊見啦，尤其噚日見小明嗰幾位，都被外界一口咬定係中央較易撬嘅泛民票，換轉佢係梁耀忠，都未必想畀小明美麗的遐想。