阿里巴巴如無意外，會在一個月後正式登陸美國。原本這個時間，IPO應該要進入大直路，但阿里卻不斷爆出大新聞，一單勁過一單：如股權架構涉及大量官二代、金融業務重組、新收購公司出現會計違規問題等。連已放上網的招股書，都改到去第四版了；而且，仲很可能要繼續改。
雖然市場對阿里上市期待殷切，講到一定「爆」，唔買就走寶咁，但芬佬們其實儍唔晒，對阿里仍存不少戒心。
阿里最令投資者卻步的，是公司架構複雜和企業管治問題。阿里最近把旗下的中小企信貸業務，出售予母公司，自己集中做網購，而包括支付寶在內的金融業務，就全部整合在母公司之中。表面上架構清晰咗，不過實際上阿里日後可分取整個金融業務的稅前盈利比例，卻由以前的49.9%大降至37.5%。雖然話母公司併入了信貸業務後，整個餅會大咗，但多除少補後，長遠而言到底係「益」上市公司、定馬雲自己着數？阿里根本無披露足夠的業務數據畀投資者去評估，可謂毫無透明度可言。
至於日後金融業務如果上市，阿里有權增持三分之一權益，表面上睇是好事，但實際上係得個「講」字──等監管機構真係會批准先再講啦。
海迪