周日舉行嘅8.17大遊行，冇咗市民「反中央、撐張融」，卻有唔少市民為飲食、攞錢甚至「鳩嗚」（購物）而現身。到底呢場反佔中大龍鳳，有幾多真情與假意？一如遊行人數，八方都唔識點去估算咯，反正真的假不了，假的真不了。但有泛民中人以7.1遊行做對比，解構呢場號稱香港建制派史上最大規模嘅遊行，「被動員」成份極高嘅三大特徵。八方即時「去片」！
踴躍捐錢vs心急收錢
有圖有真相！年年7.1遊行，「人人都是肥佬黎」，沿途擺檔嘅政黨或者團體，如果設有捐款箱，自發上街嘅市民，一定願意為咗泛民有財力爭取普選而慷慨解囊，善款箱個個都爆晒。好似今年7.1咁吖，佔中三子嘅攤位就人頭湧湧，最終籌到139萬。反觀8.17遊行，不單遊行人士唔會捐錢，唔少傳媒仲影到唔少人急住遊行完收錢，甚至遊行前已收錢，要利誘先現身，甚至未出發已鬆人。
靜候出發vs報到走人
相信唔少市民試過喺烈日當空卅幾度之下，都靜心喺維園等待出發，點解唔怕曬都要等？因為好想呢條爭普選之路上，多一個發自內心嘅足迹，難怪成日都見逼爆維園嘅盛況。之但係，喺8.17嘅遊行呢，雖然同樣由維園出發，但幾個足球場就好吉喎，因乜解究？唔少傳媒揭發，好多參加者到咗維園只求報到，點名後立即搭港鐵鬆人。為造數而到一到，咁算唔算報大數？
主動執垃圾vs隨手丟垃圾
真正熱愛香港嘅市民，唔只想人人都有真正投票機會，更加想大家有個理想居住環境，所以7.1上街嘅有心人，都會認同香港是我家，唔會喺自己屋企亂丟垃圾，仲有義工邊行邊執垃圾㖭！8.17遊行呢，幾乎處處都見小型垃圾崗，水樽用品一地都係；最離奇嘅係，垃圾桶入面嘅垃圾，竟然好多都係啲遊行標語同橫額，同埋國旗、區旗，仲要係未行完已被丟，趕「收工」趕得好緊要。
李八方
mailto:[email protected]