阿里影業（1060）上星期自爆上手管理層涉財務管理不當，即惹來可能影響阿里巴巴到美國上市嘅揣測，華華仲以為阿里主席馬雲忙緊點拆彈，點知佢噚日飛咗去南韓拜會南韓總統朴槿惠。
從網上相片發現，今次馬雲嘅打扮，跟之前佢隨同習總出席中韓經貿合作論壇時着中山裝好唔同，今次佢着老西兼打橙色領帶，望落去仲好似剪咗髮冇幾耐㖭，醒神好多。
朴槿惠就着上青綠色外褸，跟馬雲套深色老西形成強烈對比。據報，雙方主要傾吓兩國喺電子交易、遊戲、影視等領域合作。
咁又係，阿里嘅業務真係多到不得了，公司噚日亦公佈跟海爾電視聯合推阿里電視，主打電視購物，其中一個賣點係用戶可以語音遙控。唔知馬雲見朴槿惠嗰陣，有冇建議跟當地企業三星、LG等有類似嘅合作呢？