全國人大常委會下周一舉行，其中一個議題係就香港政改作決定，港區全國人大代表中，唔少人爭住想列席，趁墟之餘又想發表吓意見。八方聽聞中央希望身兼立法會議員嘅港區人大代表全數列席，話晒立法會喺政改五部曲中有個重要角色。不過，本身係港區人大代表嘅新民黨立法會議員田北辰（圖），已經回覆唔會北上，唔係唔畀面，只係自己要信守承諾，唔想得罪老婆大人。田二少話當初參選立法會時應承過老婆，全年點忙都好，8月最後兩個禮拜，一定要放假陪吓屋企人，特別係抽時間探望外母，為免家變，佢寧願向老婆「交人」都唔列席人大，橫掂要畀意見，喺香港都畀到。