錦藝紡織（565）成間公司市值得5.8億元，街貨市值更加只得1.6億元，乾到爆之餘，集團淨現金係總市值嘅兩倍，內地資金求殼若渴，錦藝有潛質。
錦藝大股東陳錦東兄弟，揸咗錦藝55.9%，連埋兩位5%樓上股東張沛霖同Dresdner VPN，喺錦藝權益總共佔72.6%，街貨權益得27.4%，街貨市值1.4億元咁大把。
又錦藝去到上年尾現金11億元，減咗銀行同債券借貸，講緊淨現金，高達10.2億元，或每股0.98元，係現價（0.56元）1.75倍。
一旦賣殼升價十倍
當錦藝喺現價，將每股淨現金0.98元，派晒出街，嚴格嚟講，除息後，錦藝係負市值。又不妨掉轉頭計，當錦藝升1.5倍到1.4元，除晒所有淨現金息後，總市值得4.5億元，街貨市值只得1.2億元。
滬港通通關，內地大把公司排隊等上市，香江殼股值租。上邊睇到，錦藝有做殼潛質，俾投資者敲門，真係唔奇。又當錦藝大股東惜貨如金，冇賣盤意欲，集團大把現金，有利擴展業務。
表面上，錦藝最新半年度純利大倒退70%，到2,727萬元。但上年同期，集團有一筆出售附屬公司收益9,248萬元，唔計呢項，一次過兼非經營收益，錦藝今年半年純利，其實係一枝箭飊升咗44倍。
好保守咁當集團下半年純利，keep住上半年水位，全年純利5,500萬元，得10倍PE。
最吸引嘅係，錦藝PB得0.54倍，場內互太紡織（1382）PB，去到3.5倍，又天虹紡織（2678）挨近1.2倍，錦藝平成截。買錦藝，當上番每股淨現金0.98元，係要升75%，PB仲喺1倍樓下，未有耐追到行家。
錢雋
細價股專家
本欄逢周二、三、五刊出