家陣好多上市公司都講企業責任，會德豐（020）近年就搞好多幫助學生認識商業社會嘅活動，太子爺吳宗權舊年主持業績會都有招呼一班中學生。會德豐就快推售一個將軍澳新盤，就首度跟區內嘅香港知專設計學院合作，搵咗一班讀緊廣告設計課程嘅學生，設計樓盤圍板。雖然公司似係搵到一班免費勞工，攞到着數，但學生因此獲得一個實習機會。
參加比賽嘅同學有百幾人，冇獎金獎品，但入圍作品可以展出，更加係學期功課之一，最終共有十幅作品入圍。其中一幅由兩位女同學合作嘅作品，以麵包砌成Good Morning字眼，寓意突破常規嘅生活。另一幅作品，4個以綠色植物作頭飾或裝飾嘅大男孩配上誇張表情，想令人關注綠色生活。